El conceyu Llanes, con unes cuarenta sableres, merecería un capítulu enteru. Aguadamía, La Canal o Cuevas, con San Antoniu, componen el primer bloque de les sableres llaneses, toes ellas abondo frecuentaes, lo mesmo que La Güelga o la pergrande sablera de Beón, al lláu de la que avancia la carretera. Toes son de sable fino, poca llonxitú y bonos servicios. La sablera Torimbia ye la más guapa del llitoral llanés y dende va abondos años ye nudista. Les de Toranda, Borizu o La Palombina y Las Cámaras, son sableres perfrecuentaes de la zona de Barru y Celoriu, playes urbanes yá daqué masificaes pero de gran guapura y sable muy fino y cande, como toles otres de Llanes.

Y la de Samartín ye otra espléndida sablera menos conocía que les anteriores. El conxuntu complétase cola de Po y les playes de la villa llanesa: El Sablón, la principal, en forma de concia; Puertu Chicu; y la de Toró enllena de roques, restos de formaciones kárstiques. Too ello ensín escaecer les perguapes playes de Cué, La Ballota y Andrín (les que s'alcuentren a dambos llaos del mirador de La Boriza) y la de Vidiago. Polo que toca al conceyu Ribadeva, col que s'allega a la frontera con Cantabria, ellí s'alcuentra la Playa de La Franca, una sablera mui concurridi con tóu tipu de servicios: un hotel y dos camping. Na baxamar pue accedese a un pequeñu pedreru, que lleva'l nome de sablera L'Osu, al traviés de La Franca.