La comarca oriental d'Asturies ye, ensín dulda, la de mayor guapura y peculiaridá del país, pola cercanía en que s'alcuentren el llitoral y los Picos d'Europa, con altores en tornu a los 2.500 metros a perpocos kilómetros de la mar. Pero amás, los valles orientales presenten tal variedá de paisaxes, viesques autóctones nel interior de la zona, pletóricos de carbayos, castañares y fayes, qu'ufierten bárbares oportunidaes p'axuntar el senderismu y la montaña cola presencia en playes de sable fino, que van de los pedreros más recoyíos a les sableres más grandes y urbanizaes.

Los Picos d'Europa son el principal atractivu ñatural de la zona, col Parque Nacional como referencia, y los Llagos (Enol y La Ercina) nel interior y la Basílica de Cuadonga (con toú'l so entornu) como puntos d'atracción turística. El Parque Nacional de Cuadonga, va unos años enantáu a tolos Picos, foi el primeru de los parques creaos n'España como entornu protexíu. Ocupaba'l macizu occidental de los Picos, con cumes que pasen de los 2.400 metros. El paisax ye montañosu, enllenu regatos, llagunes y fontes, y tamién d'especies propies de la fauna autóctona, como'l gallu montés, el raposu, el llobu, la llóMndriga, el corzu o'l robecu.

Pero tamién ye valoratible la Garganta'l Cares, na que les agües del ríu Cares abrense pasu per un requexáu escobiu ideal pa los senderistes. Dende Po de Cabrales o Camarmeña puen almirase los Picos y el so cumal más míticu el Picu Urriellu, con una perprestosa vista panorámica. Los ríos Sella y Ponga son dos de los recursos acuiferos más señalaos, destacando nel interior (Amieva y Ponga) los escobios de gran guapura polos que baxen o les fermoses vegues que s'atisben nes sos márxenes.

Les Sierres interiores del Cuera y, percima toes, del Sueve (Piloña) destaquen tamién pola so guapura y porque caltienen, nel casu d'esta cabera, una referencia mítica, la de los caballos astures (asturcones) que entá pastien pelos sos praos y que constituín una raza peculiar de pony aloyada polos romanos. Y nun pue olvidase el perguapu Bosque de Peloño, en Ponga, un de los fayeos más espectaculares del norte de la Península.