Nel Oriente d'Asturies hai un patrimoniu ricu que fala de la presencia del home al través de tolos tiempos. En Ribesella ta la Cueva del Pozu'l Ramu (Tito Bustillo), una de les más espectaculares del arte rupestre español comparatible a Altamira, y tamién la de Les Pedroses (con figures de ciervos y bisontes nes sos parees).

En Cangues d'Onís pue vese la Cueva'l Buxu, con pintures del Paleolíticu Superior, y en Llanes ta'l ídolu de Peñatu, un menhir de probable calter funerariu de la Edá del Bronce que presenta figures que correspuenden a un ídolu y un puñal grabaos na piedra y pintaos de bermeyu xunta otres representaciones. El Santuariu de Cuadonga ye otra cita obligada, cola perconocida Cueva de la Santina, onde se guardia la imaxe de la Virxen a quien la tradición atribui la victoria de D. Pelayu escontra los árabes.

En Cangues d'Onís tamién alcuéntrase'l el Dolme de la Santa Cruz, de la Edá del Bronce, na cripta d'una ermita del sieglu VII. En Ribadeva hai otra cueva del paleolíticu, la del Pindal (Pimiango), na que tamién puen vese pintures y grabaos prehistóricos. Y ente les dos Caravies (Alta y Baxa) allúgase'l Castru Caravia, del que se recoyeren munches armes, ferramientes y abalorios que s'esponen nel Museu Arqueolóxicu d'Asturies, n'Uviéu. Otres cites importantes del patrimoniu astur que tienen a Ribadeva como referencia son ensín dulda la Torre-Fortaleza de la Monarquía Asturiana qu'allevántase en Noriega o el Archivu d'Indianos, que acueye una casa característica de l'arquitectura indiana del Oriente.

Llanes, como modelu de pequeña villa costera que ye, presenta permunchos vestixos históricu-artísticos como les sos muralles qu'arrodien el cascu vieyu o'l Torreón medieval, que ye monumentu nacional. En Llanes ta tamién la Ilesia de Santa María del Conceyu, de estilu góticu y un bon númberu d'edificios singulares como la Casa'l Cercáu (sieglu XVI) d'estilu renacentista, el Palaciu Gastañaga (sieglu XV) con dos ventanares románicos perllamativos, el Palaciu los Duques d'Estrada y la Casa de Posada Herrera (sieglu XVII) qu'acueye agora la Casa Cultura de Llanes. Hai tamién una ilesia románica perimportante en Santolín, al lláu de la playa y Monasteriu del mesmu nome, cuya construcción entamó nel sieglu XI.

Nes dos Peñamelleres hai tamién varies visites obligaes, como la ilesia románica de San Pedru de Plecín, del sieglu IX (Peñamellera Alta), o la Capiella San Román (Peñamellera Baxa), una preciosa muestra del Románicu del país. Tampocu nun hai qu'escaecer la cueva con pintures rupestres que s'alluga nos arredores de El Mazu.