L'Oriente ye zona de platos singulares y munchu raigañu, abondo diferenciaos del restu'l país. Ente los más típicos alcuéntrense los emberzaos o probes (embutíu fechu con sangre de gochu, fariña de maíz y cebolla, arrolláu en fueyes de berza y cocíu) o los boronchos (fariña de maíz o boroña, chorizu y tocín) y los tortos (tortes de fariña de maíz amasaes con agua y frites) que se degusten lo mesmo na xinta, acompañaos de chorizu y güevos, que nel almuerzu, pa moyar en lleche. Otru platu singular ye la fabada con pantruque, propia de Llanes. El pantruque ye una especie de bollu ellaboráu con güevu y fariña de maíz. Les carnes de caza (mayor y menor), el gochu, y el pitu caleya son perconsumíos en tola zona. Pero destaquen muncho más los pescaos, dende'l xáragu y demás variedaes de pedréu a la llubina, el pixín, la merluza, el rodaballu, el bonitu, la trucha o'l salmón y'l congriu. Toos ellos preparaos a la chapa, en calderetes o a la sidra.

Y, percima too, el mariscu del Cantábricu, inigualable centollu, ñocla, bugre o llocántaru, llagosta, andarica, esguila y percebe. Abunden tamién los postres tradicionales asturianos, que son comunes al Centru y l'Occidente (arroz con lleche, casadielles, etc...), pero amás equí reina l'ablana, con permunches variaciones y creaciones, y la castaña. Y si hai una mancha quesera señalada n'Asturies, esa ye l'Oriente, onde puen alcontrase dellos de los más populares y sabrosos. Destaquen el de Los Beyos (ellaboráu en Ponga y Amieva con lleche de cabra, oveya y vaca), Monje (de tastu suave, pocu saláu y mantegosu), de Peñamellera (mauráu, tienru ellaboráu con tres lleches como'l de Los Beyos), Porrúa (de curtia mauración, suave y cremosu), de Pría (afumáu y semiduru), de Vidiago (suave y cremosu, ellásticu y en forma de lladriyu), Gamonéu (veteáu, secu y afumáu, d'arume intensu y tastu picañón, ellaboráu con tres lleches y de gran valor) y l'internacional Cabrales (de tastu fuerte y picañón, mantegosu al paladar). Y a estos quesos tradicionales hai que sumar munchos otros artesanos como'l de La Chivita Peña Tú y Canal de Ciercos.